Í frétt um fjárhagsörðugleika Heilbrigðisstofnunar Austurlands kristallast að mörgu leyti vandi æði margra heilbrigðisstofnana á landsbyggðinni. Þeim er ætlað að halda úti þjónustu og áhersla er lögð á að skera ekki svo niður að íbúar kveinki sér sáran. Velferðarráðuneytið lýsir sig gjarnan saklaust af því þegar þjónusta er skert og lætur stjórnendum það eftir að standa frammi fyrir sársaukafullum ákvörðunum. Í mörgum tilfellum er hreinlega ekki hægt að skera niður eins og allt of naumar fjárveitingar krefjast. Þá verður til hallarekstur og viðkomandi stjórnendur sitja uppi með vandann og aðfinnslur frá Ríkisendurskoðun. Það er nauðsynlegt við gerð fjárlaga og veitingu fjárheimilda að ráðuneyti og pólitískir fulltrúar (sem eru kjörnir til þess að taka ákvarðanir og standa ábyrgir fyrir þeim) ákveði heimildarnar í samræmi við þá þjónustu sem krafist er að veitt verði. Annað er skollaleikur sem ekki gengur upp.

	Fjármögnuðu rekstur með yfirdrætti
Ábyrgðarmaður færslu Tilkynna um óviðeigandi tengingu við frétt

Í þessari frétt er það talið sjálfgefið, að því er virðist, að öll sveitarfélög sem eru með heildarskuldastöðu yfir 150% af áætluðum tekjum ársins, þurfi að breyta fjárhagsáætlunum sínum. Þetta kann að eiga við einhver þeirra, en önnur hljóta að hafa gert áætlanir með það fyrir augum að ná skuldastöðu sinni niður á því tíu ára tímabili sem gefið er til þess í nýjum sveitarstjórnarlögum. Öllum eiga að vera kunn ákvæði laganna og að þau hafa tekið gildi. Hluti þessara sveitarfélaga er þegar með áætlanir um að skuldastaðan verði komin inn undir þetta þak löngu áður en tíu ára aðlögunartímabilið er liðið. Þau sveitarfélög þurfa væntanlega ekki að breyta fjárhagsáætlunum sínum. Þau þurfa hins vegar að árétta áætlanir sínar við eftirlitsnefnd með fjármálum sveitarfélaga og hugsanlega að gera nánari grein fyrir þeim. Blaðamönnum kann að vera nokkur vorkunn í túlkum á því sem frá eftirlitsnefndinni kemur, því það er ekki ætíð auðlesið af texta bréfanna að þessi aðlögun eigi að gerast á tíu árum en ekki þegar í stað. Til þess að átta sig á þessu þarf að lesa bréf nefndarinnar í heild og þekkja til ákvæða sveitarstjórnarlaganna. Það væri mikill kostur ef einhverjir fjölmiðlar hefðu fréttamenn með sérþekkingu í málefnum sveitarfélaga. Umfjöllun um málefni þeirra yrði þá væntanlega mun markvissari en nú er. Þó má alls ekki skilja þessi orð þannig að allt sé brenglað sem í fjölmiðlum stendur um málefni sveitarfélaga. Margt er gott en alltaf má bæta.

	Þurfa að endurskoða fjárhagsáætlanir
Ábyrgðarmaður færslu Tilkynna um óviðeigandi tengingu við frétt

Við lestur á frétt um erindi Rúnars Halldórssonar, félagsráðgjafa um upplifun hans af "Bestu útihátíðinni" sem haldin var síðasta sumar fannst mér nauðsynlegt að koma að örlitlum ábendingum. Rúnar virðist hafa fjallað um sveitarfélagið sem leyfisveitanda. Sveitarfélög eru ekki leyfisveitendur í þessum tilfellum nema þau leigi land undir viðkomandi atburð en þá nær leyfisveiting þeirra eingöngu til þess að nota megi tiltekið land ef leyfi fást fyrir viðkomandi atburði. Sýslumenn eða lögreglustjórar veita leyfin en fá umsagnir frá sveitarstjórnum og fleiri aðilum. Í þessu tilfelli gerði sveitarstjórnin kröfu um að fyllsta öryggis mótsgesta yrði gætt í hvívetna auk þess að allar eðlilegar reglur um útivist og aldursmörk yrðu virt. Þegar umsögnin var veitt var sveitarstjórnin fullvissuð um að allt myndi verða gert af hálfu mótshaldara, lögreglu og annarra viðbragðsaðila til þess að farið yrði eftir ströngustu kröfum um aldur mótsgesta og öryggis þeirra. Sjálfur var ég í "Bestu vegahátíðinni", þ.e. ég var á veginum þar sem umferðin stöðvaðist nánast í þrjár klst. í upphafi hátíðarinnar vegna þess hversu aðsóknin var mikil. Ekki fór hjá því að við þessi fullorðnu sem ekki vorum á leiðinni á hátíðina sæjum unga fólkið sem var á leið þangað. Það var mikið fjör og bjórinn kneifaður nokkuð stíft. Engin börn á aldrinum 12 - 13 ára voru sjáanleg í þeim hópum. Ég bý á Hellu og var heima við alla þessa helgi. Engin drukkin börn á aldrinum 12 - 13 ára sá ég alla helgina enda hefðu bæði ég og aðrir brugðist hart við slíku. Ég sá glaðvær ungmenni á leið til og frá verslunum og veitingastöðum. Viskí hef ég reyndar ekki séð hjá ungmennum sem eru að skemmta sér í nokkra áratugi. Bjór, Breezer og álíka er það sem þau sjást hafa um hönd. Frásögn Rúnars er að þessu leyti afar framandi fyrir mig sem þó horfði á atburðina um leið og þeir voru að gerast. Sjálfsagt er og rétt að taka vel á þessum atriðum öllum, tryggja öryggi allra mótsgesta, tryggja að engin börn undir 18 ára aldri séu með og að löggæsla og önnur gæsla sé í hámarki. Nauðsynlegt er að nálgast þessi mál út frá staðreyndum í öllum tilfellum, þá náum við bestum árangri að mínu mati.

	Guttar veifandi viskípelum
Ábyrgðarmaður færslu Tilkynna um óviðeigandi tengingu við frétt